Powèm entèdi

Powèm entèdi ak lòt powèm se yon rekèy powèm ki gen ladan l 4 liv. Ou ka rele l pito yon antoloji. Li genyen Zanmzèl ak Zonbi 28/28 Powèm entèdi ki parèt pou premye fwa nan lane 2016 epi 3 lòt rekèy ki se Movesijè, Lanmou ak Lanmo epi Leta. Rekèy sa a, se yon liv ki fèt ak yon seri mo ki di san lasisin tout koze moun pè pale lajounen. Li rasanble tout pawòl dous ki fè lavi boujonnen nan mitan lannuit. Chak powèm nan liv sa a se yon ochan pou lavi ka flewonnen menm lè lannuit bare solèy nan pwent douvanjou. Se yon chante lespwa powèt la pote, yon vèvè l trase pou lanmou gaye san mezi tankou pidetwal nan sezon Nwèl.